Юртимизда 1 октябрь — Ўқитувчи ва мураббийлар куни умумхалқ байрами сифатида кенг нишонлаб келинмоқда. Халқимизнинг устоз отангдек улуғ, деган пурҳикмат нақлида ҳам ўқитувчи ва мураббийларга бўлган самимий эҳтиром намоён. Бу байрам, аввало, ўзининг билим ва тажрибаси, истеъдод ва маҳорати, инсоний фазилатларини, кўз нури ва қалб қўри, бутун борлиғини аямасдан, маърифат йўлида беминнат хизмат қиладиган устоз ва мураббийларимизга нисбатан халқимизнинг азалий ҳурмат-эҳтиромининг яққол намунасидир.
“Ўқитувчи ва мураббийлар куни” Ўзбекистон касаба уюшмалари Федерацияси Меҳнат ва ижтмоий муносабатлар Академиясида ўзгача кайфиятда, ҳамжиҳатликда нишонланди. Ушбу байрам тадбири Академиянинг мажлислар залида ташкил этилди.
Тантанали тадбирда Академия раҳбарияти, профессор-ўқитувчилар ва талабалар иштирок этди. Байрам учун талабалар томонидан тайёрланган мусиқий чиқишлар, табриклар ва шеърлар, Ўзбекистон давлат филармонияси “Наврўз” ашула-рақс ансамблининг хушовоз хонандаси Азамат Ахмедовнинг куй-қўшиқлари устозларга чинакам байрам туҳфаси бўлди.
Таълимни муаллим беради, тарбияни мураббий, дарсни мударрис ўтади, бу учала улуғликни ўзида мужассам этган улуғ зот эса-устоз деб аталади!
Минг-минглаб мурғак қалбларга эзгулик ёғдусини сочадиган, ўз ўқувчиларига ҳаёт мактабини берадиган мўтабар зот – ўқитувчи ва мураббийларимизга бугунги касб байрамингиз муборак бўлсин, деймиз!
