//= get_resource_url() ?>
2023 yil 11 sentabr kuni O‘zbekiston kasaba uyushmalari Federatsiyasi Mehnat va ijtimoiy munosabatlar Akademiyasida yangi o‘quv yilining tantanali ochilish tadbiri bo‘lib o‘tdi.
Unda yurtimizning taniqli fan arboblari, O‘zbekiston kasaba uyushmalari Federatsiyasi mutasaddilari, Mehnat va ijtimoiy munosabatlar Akademiyasining professor-o‘qituvchilari va talabalari, Akademiya joylashgan hududdagi mahalla faollari, boy hayotiy tajribaga ega bo‘lgan faxriylar hamda ommaviy axborot vositalari vakillari ishtirok etdilar.
O‘zbekiston Respublikasi Prezidentining 2021 yil 23 avgustdagi
Qaroriga muvofiq 2022 yilda o‘z faoliyatini boshlagan mazkur Akademiya Markaziy Osiyoda yagona bo‘lib, zamonaviy innovatsion va ilmiy-pedagogik texnologiyalarni, fan va texnikaning eng so‘nggi yutuqlarini qo‘llagan holda mehnat va ijtimoiy munosabatlar sohasida talab yuqori bo‘lgan kasblar, yo‘nalishlar hamda mutaxassisliklar bo‘yicha malakali kadrlarni tayyorlashni o‘z oldiga maqsad qilib qo‘ygan.
O‘zbekiston kasaba uyushmalari Federatsiyasining Mehnat va ijtimoiy munosabatlar Akademiyasi ish boshlaganiga hali ko‘p vaqt bo‘lmagan bo‘lsa-da, mehnat va ijtimoiy munosabatlar sohasida kadrlar tayyorlash tizimini takomillashtirishga qaratilgan yangi ta’lim dasturlarini hamda o‘qitishning innovatsion shakllarini ishlab chiqish va joriy etish borasida tizimli ishlarni amalga oshirmoqda.
Bugungi kunda Akademiyada:
- mehnat muhofazasi va texnika xavfsizligi;
- hayot faoliyati xavfsizligi;
- ijtimoiy ish;
- inson resurslarini boshqarish;
- psixologiya;
- yurisprudensiya;
- menejment yo‘nalishlarida 300 nafardan ortiq talaba kunduzgi, 500 nafardan ortiq talaba esa sirtqi yo‘nalishda ta’lim olmoqda.
O‘quv jarayonlarini tashkil etish uchun 46 nafar professor-o‘qituvchi, jumladan, 3 nafar professor, 10 nafar dotsent, 2 nafar falsafa doktori va 13 nafar katta o‘qituvchi jalb etilgan.
Professor-o‘qituvchilar tomonidan barcha yo‘nalishlar bo‘yicha ishlab chiqilib, tasdiqlangan o‘quv reja va ishchi o‘quv rejalar, shu jumladan, barcha fan dasturlari va ishchi fan dasturlari amaliyotga tatbiq etilmoqda. Shu bilan bir qatorda, ta’lim jarayonining avtomatlashtirilgan “Platforma” majmuasi joriy etilgan.
Akademiyada ta’lim jarayoni kredit-modul tizimi asosida yo‘lga qo‘yilgan bo‘lib, talabalarning o‘zlashtirishini baholash zamonaviy pedagogik usul va texnologiyalar asosida amalga oshirib kelinmoqda.
Bundan tashqari Akademiyada talabalarning mukammal bilim olishlari uchun barcha shart-sharoitlar yaratilgan bo‘lib, ayni kunda intellektual doskalar bilan jihozlangan hamda internet tarmog‘iga ulangan 33 ta o‘quv auditoriyasi, shu jumladan, 3 ta ma’ruzalar zali faoliyat ko‘rsatmoqda. Shuningdek, 15 o‘ringa mo‘ljallangan 6 ta kompyuter xonasi, 50 o‘ringa mo‘ljallangan elektron kutubxona, ochiq va yopiq sport majmualari, 200 o‘rinli oshxona talabalarga xizmat ko‘rsatmoqda.